Një mbështetës i vendosjes së paqes mes saj dhe Rusisë, por ndoshta me kushte që Kievit nuk i vijnë për shtat, kryeministri hungarez Viktor Orban deklaroi se Presidenti i zgjedhur amerikan, Donald Trump, do t’i jap fund mbështetjes së SHBA-së për Kievin.

Orban është mikpritës i një takimi dyditësh në kryeqytetin hungarez, që po i zhvillon punimet nën hijen e fitores së zotit Trump.

Lufta në Ukrainë është në krye të rendit të ditës së një takimi të udhëheqësve të 27 vendeve të Bashkimit Evropian, shumica e të cilëve besojnë se vazhdimi i furnizimit të Ukrainës me armë dhe ndihma financiare janë elementë thelbësorë për sigurinë e kontinentit.

“Nëse Donald Trump do të kishte fituar në vitin 2020, këto dy vite makthi nuk do të kishin ndodhur, nuk do të kishte pasur një luftë. Situata në front është e qartë, ka pasur një disfatë ushtarake. Amerikanët do të tërhiqen nga kjo luftë”, thotë Orban.

Viktor Orban njihet si një person i afërt si me Donald Trumpin, ashtu edhe me Putinin. Forcat ruse së fundmi kanë shënuar përparime modeste në lindje të Ukrainës, por në përgjithësi, pozicionet në vijën e frontit kanë mbetur relativisht të qëndrueshme për muaj të tërë.

Mbështetja perëndimore është thelbësore për luftën e kushtueshme të Ukrainës, por Trumpi edhe vetë e ka vënë në mëdyshje vazhdimisht ndihmën amerikane për këtë vend.

Kryeministri Orban është përpjekur prej kohësh të pengojë mbështetjen e BE-së për Kievin dhe vazhdimisht ka bllokuar, vonuar ose zbutur përpjekjet e bllokut për të siguruar armë dhe fonde dhe për të sanksionuar Moskën për shkak të agresionit të saj.