Kuvendi i Kosovës, aktualisht nuk ka kuorum, ndërsa janë më shumë se 50 projektligje që duhen ratifikuar, përfshirë edhe ligje ndërkombëtare që rrezikojnë të kthehen në stadin zero nëse nuk përmbyllen me votim ratifikues.
Njëri ndër problemet që mund ta godet financiarisht Kosovën me rreth 880 milionë euro, është projekti i BE-së për Ballkanin Perëndimor ku gjashtë shteteve u janë ndarë 6 miliardë euro, që do të jepen në disa faza, mbi të cilat kriteri kryesor është sundimi i ligjit në legjislacionin e reformuar me standardet e shteteve të BE-së.
Kosova ka humbur rreth 500 milionë euro nga sanksionet e BE-së për shkak të aksioneve të pa koordinuara policore në veri të vendit dhe nëse nuk gjendet një gjuhë e përbashkët votimi në Kuvend, mbi 800 milionë euro tjera rrezikojnë të rrëshqasin nga dora.
Kosova është nënshkruese e Procesit të Berlinit duke hequr ndalesën e mallrave serbe në Kosovë, por gjendja në Kuvendin e mbetur pa kuorum, është e paqëndrueshme për votim, dhe derisa Kosova shkon kah zgjedhjet e reja nacionale, shumë fonde rrezikojnë dështimin.
Pagesat e para të pakos prej 6 miliardë eurosh për Ballkanin Perëndimor do të fillojnë të ndahen nga BE në fillim të vitit 2025, por kjo nuk do të ndodh para se ato të nënshkruajnë marrëveshjet dhe t’i ratifikojnë në Kuvendet parlamentare, thuhet në njoftimin e BE-së. Përfituesit janë: Kosova, Shqipëria, Maqedonia Veriore, Mali i Zi, Bosnjë e Hercegovina dhe Serbia.
Deri më tani vetëm Bosnjë dhe Hercegovina nuk i ka përmbushur kriteret përfituese, pasi nuk ka arritur të unifikohet rreth nënshkrimit të marrëveshjes e cila ka rëndësi për kthimin e pjesës kreditore që duhet kthyer te BE-ja.
Gjashtë miliardë euro janë ndarë për shtetet e Ballkanit Perëndimor, dy miliardë prej të cilave janë pa kthim e katër miliardë i kthehen BE-së si kredi të buta .
Kosova është përfituese e këtij programi me rreth 880 milionë euro.
Pjesa e parë prej 7% të pagesës parashikohet të transferohet nga BE te shtetet e rajonit, në fillim të vitit 2025, por nëse ndonjëri prej shteteve arrin të përmush procesin e ratifikimit të marrëveshjes në Kuvend më heret, mjetet do të deponohen menjëherë.
7% e mjeteve, parashihet të shkojnë në favor të reformave legjislative që përshtaten me ato të BE-së.
Problemet e Kosovës me mungesën e kuorumit në Kuvend
Me largimin e deputetes Millaku nga përbërja e grupit parlamentar të LVV-së, Kuvendi ka mbetur pa kuorum .
Kosova rrezikon t’i kthehen në pikën zero mbi 50 projektligje të votuara në Kuvend ,të cilat duhet ta marrin ratifikimin e Kuvendit, përfshirë edhe disa marrëveshje ndërkombëtare. Nëse të gjitha këto marrëveshje, kthehen në pikën zero, për shkak të mungesës së kuorumit, atëherë edhe ratifikimi i marrëveshjes për 880 milionë euro e BE-së rrezikon të mos kalojë në Kuvend .
Aq më shumë kur BE, gjatë gjithë procesit të realizimit të projekteve, do të ketë kushte që lidhen me shumicën votuese në Kuvend për të marr dritën jeshile të transferit të mjeteve nga BE.
Mjetet përfituese, kanë të bëjnë pikërisht me sundimi ne ligjit dhe kontrollin financiar ku bie edhe auditimi konform standardeve të BE-së, që do të thotë mos interferimi i asnjë instance politike në procedurat e sundimit të ligjit.
Kosova dhe Serbia, përveç standardeve të përgjithshme, kërkohet të përmbushin normalizimin e raporteve mes tyre, si kushte specifike, por pa specifikuar për publikun, nëse këto kërkesa janë eksplicite për zbatimin e marrëveshjes së Brukselit dhe aneksit të Ohrit.
Projekti aktual, është programi më ambicioz i deritashëm i BE-së për shtetet e Ballkanit Perëndimor që shërben si test provues se cilat shtete të rajonit, nuk kanë probleme me sundimin e ligjit dhe bllokada ndëretnike në Kuvendet parlamentare ku vihen interesat etnike para interesit të shtetit.
Programi precizon më tej se nëse mjetet e BE-së keqpërdoren, ato duhet të kthehen te fondi nga kanë dalë dhe të jepen për raste tjera./Telegram News
