I dyshuari L.D. është caktuar të paraburgoset për një muaj nga Gjykata Themelore në Prishtinë, Departamenti Special, për sulmin ndaj pjesëtarëve të KFOR-it dhe Policisë së Kosovës në Zveçan më 29 maj të vitit të kaluar.
Ai akuzohet për vepra penale si “Bashkimi për veprimtari kundër kushtetuese”, “Rrezikimi i personave nën mbrojtje ndërkombëtare”, “Pjesëmarrja në turmë që kryen vepër penale dhe huliganizmi”, si dhe “Sulmi ndaj personit zyrtar”.
Gjykata ka vlerësuar se kushtet për caktimin e paraburgimit janë plotësuar, pasi që lënë në liri, L.D. paraqet rrezik që të ikë dhe të shmanget nga procedura penale.
Ai gjithashtu ka qëndruar në arrati deri në momentin e arrestimit dhe ka nënshtetësi të Serbisë, ku edhe punon, e cila e bën të pakapshëm për organet e drejtësisë të Kosovës.