Zyra e Prokurorit të Specializuar në Hagë, i ka bërë disa ndryshime në listën e dëshmitarëve, në rastin e ish krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.
Sipas një dokumenti të publikuar, ZPS-ja nuk do të mbështetet më në dëshminë e disa dëshmitarëve, emrat e të cilëve s’janë publikuar.
Ndër të tjera thuhet se disa dëshmi do të jepen me shkrim.
Pas këtyre ndryshimeve, vetëm gjashtë dëshmitarë mbeten për të cilët ende nuk është dhënë një njoftim ose një konfirmim për statusin e tyre.
“Me këto ndryshime të mëtejshme, vetëm gjashtë dëshmitarë mbeten për të cilët ende pritet një njoftim ose tregues tjetër i statusit. Kjo do të bëhet, siç është paraqitur më parë, sa më shpejt që të jetë e mundur për të siguruar kohë të mjaftueshme për përgatitje”, thuhet në njoftim.
Tutje, Zyra e Prokurorit të Specializuar, ka deklaruar se do të bëjë njoftimet e nevojshme në kohën më të përshtatshme për të mundësuar përgatitjen e duhur.
Kjo paraqitje është dorëzuar si konfidenciale në përputhje me Rregullën 82 pika 4 e procedurave të Gjykatës Speciale.
Ndryshe, Thaçi, Veseli, Krasniqi dhe Selimi gjenden në paraburgim në Hagë nga muaji nëntor 2020.
