Komuna e Prishtinës ka nënshkruar kontratën në vlerë prej rreth 6.5 milionë euro për ndërtimin e “ishullit urban”, që do të lidh lagjen “Arbëria” me Pallatin e Rinisë. Firmat janë vënë para dy ditësh.
Në njoftimin për nënshkrim të kontratës të publikuar në faqen zyrtarë të Komisionit Rregullativ të Prokurimit Publik, figuron se punët për këtë projekt pritet të zgjasin 180 ditë.
Punët i janë besuar konsorciumit “N.N.P. EURO CONSTRUCTION; EURO ABI SH.P.K; Beni Construction SH.P.K; Arifaj. Shpk”. Vlera e përgjithshme e kontratës është 6 milionë e 589 mijë e 459 euro.
“Pagesa e paradhënies (parapagimit) behet 15 ditë kalendarike nga data e pranimit të kërkesës së Menaxherit të projektit pra afër datës 20.11.2024, sipas Kushteve të veqanta dhe kushteve të pergjithshme të kontratës neni 26.1 , poashtu edhe sipas deklaratës bankare (IS BANK) të dorëzuar në ofertën e tij e datës 25.09.2024”, theksohet në fund të njoftimit.
Ndryshe, me këtë kontratë parashihen punët e dheut, punët e strukturës, arkitektura dhe ndërtimoi, instalimi i ujësjellësit dhe kanalizimit, instalimet elektrike, instalimet makinerike, elaborate i mbrojtjes nga zjarri, punët e jashtme dhe rregullimi i peisazhit dhe ashensorët. Tek secila prej këtyre punëve, në dosjen e tenderit specifikohetr se si duhet të kryhen punimet.
