Lidhja Demokratike e Kosovës pas tubimit në Prishtinë, të premten mbrëma mbajtën siç e quajnë ata ‘Turneun e Ndryshimit’ në qytetin e Vitisë.

Kryetari i LDK-së ka publikuar një video nga ky tubim, ku ndër të tjera thotë se “Ne jemi ndryshimi për Kosovën”.

Kurse, në një postim tjetër në Facebook flet më gjatë për këtë tubim, ku njofton se kryetari i Vitisë, Sokol Haliti, do të jetë kandidat për deputet, ndërsa shton se “LDK hyn në ekipin më të mirë të vet”, për zgjedhjet e 9 shkurtit.

“Me Turneun e Ndryshimit vazhduam sonte në Viti! Aty, me Kryetarin Sokol Haliti, takuam shumë qytetarë të Vitisë që po bëheshin vet ndryshimi! Po bëheshin vet shpresa e një shteti tek i cili besojmë fort! I lumtur dhe plot shpresë me entuziazmin e madh që nisi dje në Prishtinë e vazhdoj sot në Viti. Sokol Haliti do të jetë pjesë e listës për deputet; sepse në zgjedhjet e 9 shkurtit, LDK hyn me ekipin më të mirë të vet!”, ka shkruar Abdixhiku.

Ai tutje thotë se vizioni i tij nuk ka të bëjë vetëm me një Kosovë të suksesshme, por me qytetarë të suksesshëm në një Kosovë që ecë mbarë.

“Unë besoj në shtetin e Kosovës dhe potencialin e jashtëzakonshëm që ky vend i bekuar me njerëz të shkëlqyeshëm ka! Dhe vizioni im nuk ka të bëjë vetëm me një Kosovë të suksesshme, por me qytetarë të suksesshëm në një Kosovë që ecë mbarë! Njerëz që mund t’i ndjekin ëndrrat e tyre, të jetojnë me dinjitet, të jetojnë drejtë, të ndërtojnë të ardhmen e tyre mu këtu, në shtëpitë e tyre, tek familjet e tyre, në qytetet e fshatrat e tyre! Dua ta shoh Kosovën jo si të fundit në rajon, por si një vend krenar prijetar mes të tjerëve përreth, si një shtet ku mirëqenia, mundësia e uniteti nacional janë pjesë e përditshmërisë sonë!”, ka shkruar ai.

Abdixhiku ka njoftuar se sot LDK do të mbajë tubim në qytetin e Pejës.