Profesori i Universitetit Johns Hopkins në Washington, Edward P. Joseph, në një intervistë për RTV21, ka komentuar insistimin e Kryeministrit Albin Kurti për një draft-statut të ri, edhe pse kishte pranuar përmbajtjen e propozimit evropian.
“Kryeministri Kurti pranoi përmbajtjen, pranoi fjalët e statutit. Ishte forma rreth së cilës ai kishte shqetësime. Forma duhet të kishte blloqe nënshkrimesh. Kështu që ai pranoi përmbajtjen, por kishte një rezervë për formën, që e kuptoj. Por nuk e kuptoj tani, në qoftë se ju e pranuat përmbajtjen, si mund të thoni tani: Oh, dua të bëjë një statut tjetër. Këtë nuk e kuptoj”, ka thënë Joseph.
Profesori amerikan është referuar ngjarjes së vitit të kaluar në Bruksel, ku krerët e tre shteteve të BE-së, Franca, Gjermania dhe Italia, kishin zhvilluar takime me Kurtin dhe Vuçiqin.
Joseph thotë se Kurti ka të drejtë të kërkojë nënshkrimin.
“Mendoj se është e arsyeshme që kryeministri Kurti të kërkojë nënshkrim. Për mendimin tim, kjo është plotësisht e arsyeshme. Kemi parë çfarë bëri Presidenti Vuçiq, pas gjithë kësaj dhe kështu me radhë, dhe normalisht ju e bëni këtë. Duhet të kujtoni se Presidenti Vuçiq nënshkroi marrëveshjen e Uashingtonit, megjithëse pak ndryshe, por ai nënshkroi. Dhe kështu mendoj që është në rregull”, ka thënë Joseph.
