Ministri i Administrimit të Pushtetit Lokal, Elbert Krasniqi, përmes një postimi në Facebook, ka shkruar se një koktej molotovi dyshohet se është hedhur rreth mesnatës në oborrin e një shtëpie te lagja “Kroi Vitakut”, në veri të Mitrovicës.
Krasniqi tregon se nuk ka asnjë person të lënduar përveç dëmeve materiale që i ka shkaktuar zjarri.
Lajmi është konfirmuar dhe nga zëvendës drejtori i Policisë së Kosovës për rajonin e veriut të Mitrovicës, Veton Elshani.
Sipas tij, patrulla policore ka vërejtur një tym tek një shtëpi dhe siç tha Elshani kur janë afruar kanë vërejtur derën e hyrjes e cila ishte duke djegur.
“Rreth orës 00:30 Patrolla Policore e cila ka qenë në patrullim ka vërejt Tym tek një shtëpi te ‘Kroi i Vitakut’. Kur është afruar afër Policia ka vërejt derën e hyrjes e cila ishte duke u djegur. Zjarri është fikur nga patrulla, ndërsa dëme ka pësua dera e hyrjes së kësaj shtëpie.
Dyshojmë se kemi të bëjmë me zjarr-vënie dhe që ky zjarr është shkaktuar nga koktej i molotovit”, ka thënë Elshani.
Sipas tij, për momentin nuk ka të dyshuar apo të arrestuar, ndërsa policia po punon në drejtim të ndriçimit të rastit.
