Ish-ministrja e Financave dhe deputetja e Lidhjes Demokratike të Kosovës Hykmete Bajrami, ka reaguar ndaj deklaratës së ministrit të Financave, Hekuran Murati pasi ky i fundit ka thënë se rreth 61 mijë familje janë subvencionuar për faturat e energjisë në gjashtë muajt e fundit.

Bajrami në reagimin e saj në Facebook ka thënë se ky financim është nga BE-ja dhe se sipas aj, ministri, Hekuran Murati duhet të mbahet përgjegjës për faktin që ka premtuar lirim të çmimit të energjisë dhe  sipas saj, e kanë bërë të kundërtën në pushtet, shkruan Telegrami.

Madje deputetja e LDK-së ka thënë se falë politikave të Qeverisë Kurti, 61 mijë familje apo 250 mijë banorë jetojnë në varfëri ekstreme.

“Propaganda e ministrit që rritjen e varfërisë mundohet ta shesë si sukses. 61 mijë familje në vendin tonë u subvencionuan për faturat e energjisë elektrike në gjashtë muajt e fundit. Financim ky komplet nga BE për familjet pa të ardhura ose me të ardhura të ulëta. Pra Bashkimi Evropian është institucioni që duhet të falënderohet për këtë ndihmë e Qeveria Kurti me minister Muratin duhet të mbahet përgjegjëse që përkundër faktit që erdhën në pushtet duke premtuar lirim të çmimit të energjisë elektrike e rritën atë deri në papërballushmëri për 61 mijë familje në Kosovë. Falë politikave dhe mospunës së kësaj Qeverie sot 61 familje apo rreth 250 mijë banorë jetojnë në varfëri ekstreme dhe ministri i financave mundohet që këtë ta shes si lavd”, ka shkruar Bajrami./Telegrami.co./