Komandanti i KFOR-it, Gjeneralmajor Enrico Barduani, ka mirëpritur në kampin në Prishtinë kryevëzhguesen e Misionit të Bashkimit Evropian për Vëzhgimin e Zgjedhjeve, deputeten franceze Nathalie Loiseau.
Sipas njoftimit të KFOR-it, gjatë takimit u diskutuan tema të ndryshme që lidhen me sigurinë e qëndrueshme në Kosovë, stabilitetin rajonal dhe përpjekjet e Misionit të BE-së për të siguruar një proces zgjedhor transparent dhe demokratik.
“Gjeneralmajor Barduani nënvizoi përkushtimin e vazhdueshëm të KFOR-it për të ofruar një mjedis të sigurt për të gjithë njerëzit që jetojnë në Kosovë, pavarësisht nga përkatësia etnike, gjinia, feja apo përkatësia politike”, thuhet në njoftim.
Po ashtu, KFOR-i theksoi se vazhdon të zbatojë mandatin e tij sipas Rezolutës 1244 të Këshillit të Sigurimit të OKB-së të vitit 1999, duke kontribuar në ruajtjen e një ambienti të sigurt për të gjithë qytetarët dhe komunitetet e Kosovës, si dhe garantimin e lirisë së lëvizjes.
“KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX) në rolet e tyre përkatëse si reagues të sigurisë”, theksohet më tej në njoftim.
