Qeveria holandeze ka njoftuar synimin e saj për të penguar Serbinë nga avancimi në fazën tjetër të procesit të anëtarësimit në Bashkimin Evropian.
Ky vendim buron nga shqetësimet e vazhdueshme për përkushtimin e Serbisë ndaj vlerave demokratike, të drejtave të njeriut dhe shtetit të së drejtës, raporton media holandeze “Dutch Times”.
Sipas këtij mediumi, “një pikë e rëndësishme mosmarrëveshjeje është trajtimi i marrëdhënieve të Serbisë me Kosovën”.
“Holanda, së bashku me disa vende të tjera anëtare të BE-së, i ka kërkuar Serbisë që të normalizojë raportet me Kosovën, e cila shpalli pavarësinë në vitin 2008. Ndërsa sovraniteti i Kosovës njihet nga pjesa më e madhe e BE-së, Serbia refuzon ta njohë atë, duke çuar në tensione të zgjatura rajonale. Përshkallëzimi i fundit në veri të Kosovës, ku pakica etnike serbe u përplas me autoritetet kosovare, i kanë intensifikuar këto shqetësime”, thuhet në këtë artikull, transmeton Klan Kosova.
Holanda ka theksuar se progresi në procesin e anëtarësimit në BE “varet nga vullneti i Serbisë për t’u angazhuar në dialog kuptimplotë me Kosovën nën ndërmjetësimin e BE-së”.
Media holandeze shkroi po ashtu se “ky vendim nxjerr në pah shqetësimin në rritje brenda BE-së në lidhje me përafrimin e vendeve kandidate me parimet thelbësore evropiane”.
“Procesi i pranimit të Serbisë tashmë është përballur me vonesa për shkak të shqetësimeve të ngjashme të ngritura nga shtetet e tjera anëtare. Qeveria holandeze do të shprehë zyrtarisht kundërshtimet e saj gjatë diskutimeve të ardhshme të Këshillit të BE-së për zgjerimin, ku do të vlerësohet progresi i Serbisë. Ky vendim ka të ngjarë të ndikojë në dinamikën më të gjerë të zgjerimit të BE-së në Ballkanin Perëndimor, si dhe në marrëdhëniet e ardhshme të Serbisë me vendet anëtare të BE-së”, u tha në raportin e medias holandeze, “Dutch Times”.
