Policia e Kosovës ka dhënë detaje lidhur me aksidentin që ndodhi dje në Bresalc të Gjilanit, ku si pasojë e lëndimeve ka vdekur një grua.

Në raportin 24 orësh të Policisë thuhet se edhe katër persona të tjerë kanë marrë lëndime. Në raport thuhet se në këtë aksident ishin të përfshira tri vetura.

“AKSIDENT TRAFIKU ME FATALITET – Fsh. Bresalc, Gjilan 31.10.2024 – 14:55. Raportohet se ka ndodhur aksident trafiku në mes të tre veturave. Si pasojë, pesë persona kanë pësuar lëndime trupore dhe janë dërguar në emergjencën e Gjilanit, ku një femër ka ndërruar jetë, vdekjen e të cilës e ka konstatuar ekipi mjekësor. Me vendim të prokurorit, trupi i pajetë dërgohet në IML për obduksion”, thuhet në raport.