Futbollistët e Bayer Leverkusen janë ngritur në pozitën e katërt pasi shënuan fitore si vendës kundër Heidenheim me rezultat 5:2, në kthesën e madhe në të cilën mysafirët u treguan “arrë e fortë” në pjesën e parë me dy gola epërsi.
Bayer në këtë mënyrë arriti deri te fitorja e pesë në edicionin e ri të Bundesligës, ndonëse tri pikët e reja u siguruan me mjaft vështirësi.
Heidenheim, i cili renditet në pozitën e 15-të me 10 pikë, erdhi deri te dy gola të shpejtë në pjesën e parë përmes Norsch në minutën e 10-të dhe Honsak në minutën e 21-të.
“Farmaceutikët” shumë shpejt “u zgjuan nga gjumi” duke shënuar hiq më pak se pesë gola, në mesin e tyre edhe Granit Xhaka (82).
Fillimisht, avantazhin e papritur të mysafirëve e zvogëloi Palacio në minutën e 30-të, pas asistimit të futbollistit shqiptar. Vetëm dy minuta më vonë shifrat u barazuan, pasi çeku Schick shënoi pas asistimit të Wirtz.
Në pjesën e dytë brenda gjysmë ore lojë Bayer Leverkusen shënoi tri herë – dy prej tyre Schick (52, 71) duke shënuar kështu het-trik, derisa golin e pestë e shënoi Xhaka.
Sot gjatë ditës Borussia Dortmund mposhti si vendës Freiburg 4:0, Hoffenheim me mjaft mund ia doli të fitojë në terrenin vendës ndaj Leipzig 4:3, Stuttgart mposhti pa probleme Bochum 2:0, Wolfsburg fitoi tri pikë ndaj Union Berlin 1:0 dhe Eintracht Frankfurt i shkaktoi humbje Werderit si vendës me rezultatin 1:0.
Të dielën në programin e Bundesligës janë dy ndeshjet e fundit të xhiros së 11-të ndërmjet Holstein Kiel-Mainz 05 dhe Borussia M’gladbach- St.Pauli.
Bayer Munih prin në tabelë me 29 pikë, pasuar nga Eintracht Frankfurt me 23, Leipzig 21.
