Policia e Kosovës ka njoftuar se ka ndërmarrë masat e nevojshme për menaxhimin e sigurisë gjatë manifestimeve të “Vidovdanit” të mbajtura sot.

Masat përfshijnë ruajtjen e rendit publik, orientimin e trafikut rrugor dhe menaxhimin e kufijve.

Autoritetet policore kanë paraparë masa planifikuese, koordinuese, parandaluese dhe operative në të gjitha departamentet dhe rajonet policore për të siguruar që manifestimet të zhvillohen pa incidente në lokacionet e parapara.

Nga informacionet e njësive të angazhuara në teren nuk raportohet për raste që kanë ndikuar në mbarëvajtjen e manifestimeve, përveç shoqërimit të një personi në stacion policor për intervistim sipas procedurave ligjore.

Pas përfundimit të aktiviteteve në orët e pasdites, të gjithë pjesëmarrësit janë shpërndarë pa incidente.