Kryetari i Aleancës për Ardhmërinë e Kosovës, Ramush Haradinaj, ka kritikuar Qeverinë Kurti lidhur me çështjen e energjetikës.
Përmes një postimi në Facebook, Haradinaj tha se Qeveria Kurti e ka anuluar projektin amerikan të gazit dhe se e ka detyruar kompaninë amerikane të tërhiqej nga Kosova C për shkak se çmimi prej 80 euro iu ka dukur i lartë.
“E anuluan projektin Amerikan të gazit. E detyruan Kompaninë Amerikane të tërhiqej nga Kosova C sepse iu duk çmimi prej 80€ tepër i lartë. U mbështetën tek mafia energjetike e rajonit që dihet se nga kush udhëhiqet dhe paguajtën veç për dy vjet (2022 dhe 2023), hiç më pak se 365,706,835.9€ para të Kosovës. Në krahasim me dy vitet 2018 dhe 2019 kjo është afër 4.5 herë më shumë apo 282€ milionë më shumë nga koha sa kemi importuar në kohën kur unë isha Kryeministër.
Me të vërtetë tronditëse e dhëna se për dy vjet mesatarja e pagesës ditore për mafinë energjetike është hiç më pak se 500.000 euro në ditë. Këto janë të dhëna nga raporti i Zyrës së Rregullatorit të Energjisë Elektrike të Kosovës, për vitin 2023”, ka shkruar ai.
Kreu i AAK-së tha se është fyer kur ka dashur që Kosova C të prodhonte rrymë me çmim prej 83 euro e ndërsa në vitin 2022 Qeveria Kurti sipas tij ka blerë rrymë prej 268 euro e 82 centë.
“Më shanë e më fyen sepse deshta që Kosova C të prodhonte rrymë me çmim prej 83€. E morën pushtetin dhe blejtën rrymë në vitin 2022 me çmim mesatar prej 268.82€ dhe në vitin 2023 prej 129€. I shërbyen jo shtetit të Kosovës dhe popullit të saj, por mafisë energjetike”, shtoi ai.
Haradinaj akuzoi Qeverinë Kurti se po bën krim ndaj Kosovës dhe shtoi se Kurti duhet të jap përgjegjësi para gjithë të tjerëve.
“Figurat kryesore të VV-së po i heton Prokuroria dhe do të hetojë dhe gjejë gjithçka, por një dihet; se ky është krim që i është bërë këtij vendi dhe askush nuk duhet të shkojë në përgjegjësi para Kryeministrit aktual të Kosovës. Krenohej nga foltorja e Parlamentit “se ka ç’montuar Contour Globalin”, po del se ka dashtë ta ç’montojë popullin e vet”, tha ai. /TelegramNews/
