Autoritetet serbe vazhdojnë kërkimet për të gjetur shtetasin kosovar Faton Hajrizi, i dyshuar për vrasjen dhe plagosjen e policëve në Serbi.
Zëvendëskryeministri i Serbisë dhe ministri i Brendshëm Ivica Daçiq e cilësoi vrasjen e një zyrtari policor në Lloznicë si akt terrorist nga strukturat shqiptare në Kosovë. Ministria e Brendshme e Serbisë zbuloi se në vendngjarje është gjetur një pasaportë me emrin Artan Hajrizi dhe një dokument identifikimi gjerman.
Daçiq tha se po verifikohen faktet për të vërtetuar nëse personi që i janë gjetur dokumentet në veturë është vëllai i Faton Hajrizit, i cili kishte arratisur nga burgu në Kosovë. Ai gjithashtu njoftoi për arrestimin e Mithat Haxhiqit nga Tutini dhe një person tjetër në Bosnjë e Hercegovinë në lidhje me rastin.
Kryeministri i Kosovës Albin Kurti nuk shtoi informacione të reja për rastin gjatë një konference për media, duke theksuar se organet e sigurisë në Kosovë po mbledhin informacione dhe bëri thirrje që mos të politizohet rasti.
Ministria e Jashtme e Kosovës po monitoron zhvillimet përmes Zyrës së saj në Beograd, ndërsa policia serbe dhe ajo e Bosnjës vazhdojnë hetimet në tri lokacione për të kapur personin që kryeu vrasjen dhe plagosjen e policëve serbë.
