Kremlini reagoi me kujdes ndaj deklaratave të presidentit ukrainas, i cili kishte treguar shenja për të biseduar me Moskën një ditë më parë, për herë të parë që nga pranvera e vitit 2022, duke përmendur praninë e Rusisë në një samit të ardhshëm të paqes.
Volodimir Zelenski tha të hënën se ai ishte në favor të pjesëmarrjes së Moskës në një samit të ardhshëm, pas një konference për paqen mbi Ukrainën e organizuar në mes të qershorit në Zvicër. Në atë kohë u ndoq nga dhjetëra udhëheqës botërorë, por Rusia nuk ishte e ftuar.
“Samiti i parë i paqes nuk ishte aspak një samit i paqes, kështu që padyshim që së pari duhet të kuptojmë se çfarë do të thotë Zelensky me këtë,” tha zëdhënësi i presidencës ruse Dmitry Peskov në një intervistë me kanalin televiziv Zvezda.
Zelensky tha më herët se në nëntor, muaji që SHBA zhvillon zgjedhje presidenciale, ai dëshiron të paraqesë një “plan të drejtë paqeje”, pas afro dy vjet e gjysmë konflikti të madh që rezulton në qindra mijëra viktima.
Ai gjithashtu tha se donte që “përfaqësuesit rusë” të merrnin pjesë në samitin tjetër për paqen në Ukrainë, data e së cilës ende nuk është caktuar. Gati 20 përqind e territorit të Ukrainës është ende nën okupimin rus, dhe shanset për armëpushim janë minimale.
