Koreja e Veriut testoi të hënën dy raketa balistike, porse njëra prej tyre mund të ketë fluturuar në mënyrë jonormale, tha ushtria e Koresë së Jugut.
Shefi i Shtabit të Përgjithshëm tha se raketat u lëshuan në një interval prej dhjetë minutash, nga qyteti Jangjon në juglindje të Koresë së Veriut.
Ai tha se raketa e parë fluturoi 600 kilometra dhe raketa e dytë 120 kilometra, por nuk tregoi se ku zbarkuan.
Koreja e Veriut zakonisht teston raketa drejt ujërave të saj lindore, por distanca e fluturimit të raketës së dytë ishte shumë e shkurtër për t’i arritur ato ujëra.
Zëdhënësi i Shefit të Shtabit të Përgjithshëm, Lee Sung Joon, tha më vonë se raketa e dytë pësoi një fluturim të mundshëm jonormal, gjatë fazës fillestare të nisjes.
Testimet u bënë dy ditë pasi Koreja e Jugut, SHBA-ja dhe Japonia përfunduan stërvitjet e tyre ushtarake në rajon.
Viteve të fundit, këto vende e kanë zgjeruar partneritetin trepalësh të sigurisë, për të përballuar më mirë kërcënimet bërthamore të Koresë së Veriut, e po ashtu edhe rritjen e Kinës.
Të dielën, Ministria e Jashtme e Koresë së Veriut i dënoi fuqishëm stërvitjet e Jugut, SHBA-së dhe Japonisë, duke e quajtur partneritetin e tyre “version aziatik i NATO-s”./REL
